Te suage de cuarte edizion de Setemane de Culture Furlane , inmaneade de Societât Filologjiche Furlane, Sabide ai 13 di Mai tal auditorium “San Micjêl” di Glemone l’Associazion “Ostermann” e propon la cunvigne “Une pignate plene d’aur. Riscuviergi e valorizâ i bens storics e artistics scuindûts o dismenteâts”. Si tacarà a lis 3 dopomisdì cui salûts dai organizadôrs e i intervents dal “grop archeologjic” de clape, ch’a presentaran il lôr lavôr di sgjâf e di ricercje tal teritori di Glemone. Po si fevelarà dal patrimoni “dismenteât” dal Pomponio Amalteo cul intervent di Morena Maresia “1976-2016: protagoniscj de propie storie. Esperiencis di educazion al patrimoni culturâl sul teritori” e di Mauro Vale “Un auguri par doi cjadalans”. La zornade si sierarà tôr lis 6 di sere cu la visite guidate ae mostre dai reperts storics dal paîs.
«La Setemane de culture furlane – al à scrit il pressident de Societât Filologjiche Federico Vicario – e torne chest an a proponi il so percors di promozion dal nestri teritori cuntune rêt di colaborazions simpri plui largje e cualificade. La storie e la memorie dal Friûl, duncje, lis personis che lu àn onorât cul lavôr, l’inteligjence e la sensibilitât, lis resons dal nestri cjatâsi e ricognossisi part di une comunitât ch’e cres in armonie e concuardie, l’identitât di un popul, lis istituzions ch’a rapresentin i siei valôrs. Chest al è il troi ch’al segne la Setemane de culture furlane pal 2017, une rassegne pensade e realizade par dâ continuitât a un’esperience di riflession su moments impuartants de nestre vite coletive a partî de ereditât umane di chês personis ch’a àn savût capî e interpretâ in maniere plui alte il spirt dal Friûl, personis sicu Pieri Çorut, pari de lenghe furlane, Maria Tore Barbina, ricercjadore di etnografie e lenghistiche, Domeni Zannier, poete e promotôr di Scuele libare furlane, Toni Beline, scritôr e cussience critiche dal so timp, Gilberto Pressacco, musicolic e inteletuâl».
