«La storie dal Friûl no si le cjate sui libris di scuele, ni sui manuâi de Universitât: e somee platade di un vêl che nus fâs crodi che la nestre tiere e sedi stade margjinâl, cuant che invezit dilunc dai secui e je stade une crosere di popui, lenghis e grancj cambiaments». Cun chestis peraulis de cuvierte si vierç il volum Il Friûl vie pai secui publicât dal editôr Corvino e firmât di Walter Tomada e Fausto Zof.
Pensât pal mont de scuele e pai zovins di vuê, «cul fin di conservâ la memorie, par no dismenteâ il passât e par no pierdi lis lidrîs», il volum al vegnarà presentât dal storic e docent dal Isis “Magrini-Marchetti” Alberto Vidon Joibe ai 22 di Lui, li de ex-glesie di Sante Marie des Graciis in vie Caneva a Glemone, aes 9.00 di sere (s’al plûf li de ex glesie di San Micjêl dongje dal domo).
L’incuintri al è inmaneât de clape culturâl “V. Ostermann” e al jentre tes manifestazions “Gemona.Vivi.Scopri.Ama”.
